Uncategorized

الشبح 3

ايمن ويونس فضلو مستنين ياسمين تصحي

ياسمين بخترفه :منك لله اللهي تولع

يونس وايمن بصو لبعض وبعدين بصولها تآني

ياسمين : منك لله يا يونس اللهي تتشك في لسانك يابن صباح يارب خدلي حقي منو راجل لسانه فرقله

يونس اتصدم وبص لايمن شافه بيضحك عليه بس ضحك ايمن مكملش لما سمع كلام ياسمين

ياسمين : وايمن ده راجل ياست نفخ علي الفاضي ده عيل سوسه ومش قد كلامو ده يوديك البحر ويرجعك عطشان آآآآآآه يارب تقع من علي السلم وإنت ماشي يابن أم معرفش أمك إسمها إيه منك لله أشوف مسحول سحله سودا

ايمن بص ليونس بصدمه وهو بيشاور على نفسه بمعنى ده أنا يونس بصله بضحكه وهز راسو فوق وتحت بمعنى آه

ايمن بص لياسمين بتوعد لما تفوق

كملت ياسمين : وناصر يا رب ده بقي الراس الكبيره احرقو يارب اشويه اقليه حطو في الفرن اي حاجه بس انتقم منو بتاع الكبد والقوانص ده ربنا ينتقمك يا ناصر يابن ام ناصر يارب وانت نازل من سلم فيلتك تتزحلق تتكسر رقبتك وتخش جهنم بريس ويبقي صاحب البيت إللي طردني
ايمن بصدمه : إيه ده دي جابت رجل كله البنت دي إيه يا خربيت لسانها

يونس بصدمه: أنا كنت فاكر إنها طيبه ومش محترمه قصدي محترمه بس طلعت عكس كده خالص دي بتشتم فينا في أحلامها

ايمن بسخريه: كلمه الحق بتظهر آوي وآحده يا شبح

يونس : نستني بقي لما تصحي علشان تكلم الزفت
ايمن هز دماغه

بعد شويه ياسمين فاقت وقالت وهي حاطه أيديها دماغها : آه هو إللي حصل
ايمن بصلها بتوعد
ياسمين بخوف : هو إنت بتبصلي كده ليه وبعدين بصت ليونس : هو بيبصلي كده ليه يا يونس لكن لاقت يونس بيبص ليها نفس بصه ايمن خافت اكتر : إيه ده إنتو هتبعوني قطع غيار ولا إيه في إيه يا جدعان مالكو

ايمن كان لسه هيقرب منها بس الباب خبط راح بص في العين السحريه لاقي صبا وامها جري بسرعه علشان يلبس النقاب

ياسمين بأستغراب : في أيه مين علي الباب وليه بتلبس البتاع ده
ايمن وهو بيلبس النقاب أتكلم بسرعه : دي الدكتوره صبا جارتك اللي ساكنه في الشقه اللي جمبك هي ومامتها بصي أنا معرفهم إني صاحبتك واسمي سوزان وجتلك زياره أشوفك ولما آنتي تعبتي خبط عليها وجت كشفت عليكي اوعي تقعي لا لسانك قدامها وتقولي ايمن أنا إسمي سوزان ماشي

ياسمين : ماشي طب يلا يلا البت هتحنط بره
ايمن راح بفتح وعمل صوته بصوت البنات : أهلا أهلا اتفضلو
ياسمين سمعت صوته استغربت بس افتكرت انو عامل صاحبتها وكانت هتضحك علي منظره وهو بيتكلم بس مسكت نفسها
ام صبا وهي مسكه صنيه الاكل ورايحه جنب ياسمين: إزيك يا بنتي عامله اية الف سلامه عليكي وراحت حضنتها
ياسمين بأبتسامه وهي بتحضنها: الله يسلمك يا طنط تسلميلي يارب وبعد كده خرجت من حضنها وبصت علي صنيه: إيه يا طنط إللي حضرتك جايباه ده تعبتي نفسك ليه
ام صبا بأبتسامه : مفيش تعب ولا حاجه يا بنتي ده انتي زي بنتي صبا بالظبط وإنتي يا نن عيني قاعده لوحدك لازم اسأل عليكي

ياسمين دمعت من كلامها وحنيه قلبها ام صبا شافتها كده حضنتها : لالالا مش عايزه أشوف دموعك دي آنتي تعبانه مينفعش كده يلا علشان تاكلي علشان تخفي
ياسمين مسحت دموعها : شكرا يا طنط بس أنا مش جعانه والله
أم صبا : لا انتي كده تزعليني هتكسفيني ده عامله ليكي فراخ ورز وسلطه مليش أنا في اكل العيانين ده فراخ مسلوقه ومش عارفه إيه مسلوق إنا عامله اه فراخ مسلوقه بس دي هتكليها دلوقتي وبعدين بقي هتكلي إللي أنا عماله ده يلا بقي علشان تخدي الدوا
ياسمين ابتسمت وابتدت تاكل وام صبا قاعده تبص عليها بأبتسامه وهي حزينه علي حالتها إن هي اتيتمت وعايشه لوحدها دمعت بس مسحت الدمعه قبل ما حد يشوفها بس ايمن شافها وعرف قد إيه إن ام صبا قلبها حنين وطيبه ابتسم من تحت النقاب علي طيبه قلبها بعد شويه ياسمين خلصت اكل وصبا ادتلها الدوا واطمنت إنها بقيت كويسه عن الأول بكتير وقالت لايمن يعمل ليها كمادات علشان لسه في سخنيه
صبا بأبتسامه : بصي بقي يا ست ياسمين إحنا كل يوم هنتغدى مع بعض مره تيجي شقتنا تتغدي معانا ومره إحنا نجيب الاكل ونيجي نتغدي معاكي تمام
ياسمين بأبتسامه كسوف: مش عايزه اتقل عليكو

صبا بأبتسامه : لا متقوليش كده لا تقل ولاحاجة وبعدين الموضوع ده كان اقتراح ماما إيه رأيك هينفع تكسفي ماما
ياسمين : لا طبعا مقدرش بس انا مش هعمل كده غير لما ادفع معاكو تمن الاكل

أم صبا : أخص عليكي يا صبا إحنا مش هنرضى تخليكي تدفعي حاجه آنتي زي صبا بالظبط ولا آنتى مش معتبراني زي أمك

ياسمين بسرعه : لا والله يا طنط مش قصدي انا بس علشان انتو 2 ستات لو حدكو وحضرتك عارفه يعني الحاجات بقت غاليه هنخلي الاكل بالنص وبعدين حضرتك متقلقيش أنا مهيتي حلوه ومناسبه جدا ها قولتي ايه
ام صبا : اللي يريحك يا بنتي بس انا مش راضيه

ياسمين بأبتسامه : معلش انا كده هبقي مرتاحه
ام صبا بابتسامه : ماشي يا حبيبتي وبعدين بصت لايمن : إيه يا بنتي آنتي لبسه النقاب ليه داحنا حتي ستات زي بعض اقلعي النقاب يا حبيبتي علشان متتخنقيش

ايمن بتوتر : لالا يا طنط أصلي أنا نآزله أجيب حاجات من تحت علشان ياسمين كانت محتاجها مش كده يا ياسمين

ياسمين : آه آه كانت نزله وبعدين قالت بخبث بعد ما شافت نظره ايمن لصبا :طب متنزلي دلوقتي يا ياسوزان حتي معقدش لوحدي لما تنزلي أهو طنط وصبا قاعدين معايا
ايمن بصلها بغضب وتوعد وهو بيشاور بصوابعه لرقم 2 معلمها يعني ذي تاني غلطه ليكي معايا

ياسمين بصتله باستفزاز وهي بتحرك حواجبها

صبا قالت برقه لايمن : خلاص يا سوزان لو هتنزلي انزلي وإحنا قاعدين معاها لحد ماتيجي

ايمن بصلها وقال بتوتر من نبره صوتها إللي حبها جدا : لا لا عادي أنا هبقي انزل بس شويه كده

ام صبا : طب خلاص لو هتنزلي شويه كده اقلعي النقاب بقي
ايمن بسرعه : لا حضرتك دانا افتكرت حاجه مهمه جدا عايزه اجبها عن اذنكو وبص لياسمين بمعني ماشي لما نبقي لوحدينا ونزل

ياسمين ضحكت عليه

ام صبا : بتضحكي علي اية يا حبيبتي

ياسمين خدت بالها : ها ولا حاجه يا طنط دانا افتكرت حاجه ضحكتني بس مش آكتر

ام صبا ابتسمت وبعد كده قالت : ماشي يا حبيبتي احكيلي عن حياتك بقي لو معندكيش مانع
ياسمين : لا أبدا يا حبيبتي دنا فرحانه والله اني قاعدة معاكو

بعد كده ياسمين قاعدت تحكي ليهم عن حياتها كلها

ام صبا : يعيني يا بنتي ربنا يرحمهم ومنه لله صاحب البيت ده

ياسمين : الحمد لله

صبا : وانتي معاكي اية بقي يا ياسمين

ياسمين بأبتسامه : أنا مخلصه كليه تجاره انجلش وكنت ناويه اتعين في شركه بس امي وابويا ماتو ملحقتش اعمل حاجه وغير كده الوظيفه اتخدت وكان مرتبها جميل دورت علي شغل من الشركات اللي من النوع ده بس ملقتش فشتغلت في مطعم مشهور

صبا : إيه ده دانتي كده اتظلمتي بصي أنا صاحبتي أخوها صاحب شركه العادلي للحديد والصلب لو انتي تعرفيها يعني انا هكلمها وتشوفك معاه شغل

ياسمين : ملوش داعي بقي إنت بشتغل أهو الحمد لله

صبا برفض : لا طبعا انتي معاكي شهاده جميله مينفعش مجهودك ده ترميه كده في الارض

ياسمين ابتسمت : ربنا يخليكي يا صبا أنا مش عارفه اقولك ايه

صبا بأبتسامه : متقوليش حاجه خلاص انا هكلمها وهبقي اقولك

ياسمين : ماشي يا حبيبتي

يتبع….
بعد ساعه ايمن طلع لاقي صبا وامها داخلة شقتهم وياسمين قاعدة مع يونس بيتكلمو

يونس بغضب مكتوم : انتي صحيح ناويه تشتغلي في الشركه اللي جارتك قالت عليها

ياسمين بأستغراب : آه وفيها إيه حاجه اشتغلها شهادتي مفهاش مشكله

يونس بعصبيه : ايوه بس كريم العادلي ده شخصيه زباله ومش محترم وبتاع ستات

ياسمين : الله بقي هو إنت كل واحد عايز تطلعلي في القطط الفطسه في إيه يا يونس الله أنا حره إشتغل في أي حتة أنا عايزاها محدش ليه دعوه

يونس بغضب : لا مش حره
ايمن : فس ايه يا جماعه اهدو صلو علي النبي

ياسمين بعصبيه : بص يا ايمن دلوقتي صبا لما عرفت إن أنا معايا شهاده كويسه من الكليه بتاعتي قالت إن اخو صاحبتها فاتح شركه وقالت هتكلمها تشغلني عندو فيها مشكله

ايمن : لا

اسمين بتكلمه : دلوقتي الباشا معترض إن إشتغل في الشركة مش فاهمه ليه أنا مش مرتاحه في شغل المطعم يا أيمن وصبا قالت حرامي شهادتي ومجهود يترمو علي الارض كده

ايمن بص ليونس : وانت اللي مزعلك دلوقتي يا يونس هي عايزه تكون مستقبلها

يونس بغضب : اسألها كده عايزه تشتغل عند مين

ايمن بأستغراب : مين

يونس بعصبيه : عند كريم العادلي

ايمن بصدمه : كرين العادلي ده شمال ده مش محترم ده مينفعش يبقي في الدنيا أصلا

يونس : قولها قولها علشان فكرانى واقف ضدها منعرفش إن خايف عليها

ايمن بخبث: خايف عليها بردو

يونس بتوتر وعصبيه مصطنعة : اكيد يعني خايف عليها الله وبعدين أسكت بقي إما نشوف هنعمل إيه مع الزفت ده

ايمن : زفت مين

يونس بعصبيه : ايمن انا مش عايز غباء الزفت ناصر هو في غيرو

ايمن : آه معلش معلش خدني علي قد عقلي معلش وإنتي يا ست ياسمين لسه عايزه تشتغلي معاه في الشركة برضو

ياسمين بخنقه: بص يا ايمن أنا مليش دعوه بشخصيته أنا ليا دعوه بالشغل انا مش هنسبه انا هشتغل ولو جه عمل تصرف معايا كده ولا كده أنا هتصرف معاه أنا مش كتعه

يونس بعصبيه : الله وليه يا بنت الناس متخليكي في شغلك بتاع دلوقتي ليه تشحططي نفسك

ياسمين : أنا نفسي افهم إنت مالك الله متخليك في حالك بقي وخليك في انتقامك مالك بيا يا بارد وهشتغل يا يونس

يونس : مش هتشتغلي يا ياسمين

ياسمين : لا هشتغل

يونس : مش هتشتغلي
ياسمين : هشتغل
ايمن بصراخ : باااااااااس انتو الاتنين انتو اية أطفال خلينا في إللي فيه دلوقتي ونبقي نشوف الموضوع ده بعدين الله
ونس وياسمين باصو لبعض بتحدي
ايمن : ياسمين قادرة تكلمي الزفت ده ولا اية

اسمين : آه متقلقش فين التليفون

ايمن أداها التليفون

ياسمين : معلش يا ايمن جبلي الشنطة بتاعتي
ايمن نفخ وراح جبلها الشنطه وادالها

ياسمين خدتها منو بضحك وطلعت الكارت وكتبت الرقم واتصلت واستنت الرد وفتحت الاسبيكر
ناصر بأبتسامه : يا احلي يوم في عمري أخيرا الحلو اتصل بيا
ياسمين وهي بدوس علي شفايفها بقرف : شوفت بقي مردتش ازعلك وبصراحه أنا كنت بتمنى إن النهار يطلع علشان أكلمك بسرعه
ناصر بضحك : يااااااه للدرجادي
ياسمين بدلع : واكتر كمان إنت متعرفش بقيت غالي عندي قد إيه يا
ناصر : يا إيه
ياسمين : يا ناصر

ناصر بخبث: تصدقي اول مره اعرف ان اسمي حلو كده
ياسمين بكسوف مصطنع: الله بقي بتكسف
ناصر ضحك : اموت انا بقولك ايه فاضيه نتقابل انهارده في مطعم
ياسمين بصت لايمن ويونس وهما هزو رأسهم بلا وعملو حركه بايدهم معاها بكره : بص طيب معلش أصلي أنا تعبانه شويه ممكن تخليها بكره
ناصر : الف سلامه علي القمر مالك
ياسمين : لا أصلي عندي حمي ولسه واخده الدوا فمحتاج جسمي يريح شويه بس أنا مقدرتش انام من غير ماسمع صوتك كل ده ويونس قاعد هيفرقع من دلع ياسمين لناصر
بس سكت وايمن لاحظ وضحك بصوت مكتوم

ناصر : يلهووووي علي الحلو يا ناس الف سلامه عليكي يا حبيبتي

ياسمين تفت علي التليفون بصوت واطي : الله يسلمك يا روحي أنا هسيبك بقي علشان أنا تعبانه خالص

ناصر : الف سلامه علي حبيبي أنا

ياسمين : الله يسلمك سلام
ناصر : سلام ياسمين قفلت وبصت علي يونس لاقت عينه حمرا خافت منه واستخبت ورا ايمن وهو بيضحك

ونس بغضب وهو بيقلدها: مقدرتش انام من غير ماسمع صوتك الله بقي بتكسف انا بتمني النهار يتطلع علشان اكلمك

ياسمين بخوف وهي مستخبية ورا ايمن وهو عمال يضحك : الله وإنت إللي مدايقك مش إنت إللي عايز كده

يونس بغضب : أنا آه قولت بس مش لدرجادي

ايمن بضحك : خلاص يا يونس اهم حاجه ان الخطه مشيت زي ما رسمنها

يونس بص لياسمين بغضب وخي دفنت وشها في دراع ايمن وهو طبطب علي أيدها وهو بيضحك

يونس : المهم بكره انشالله لما تروحي تقابليه اي حاجه كده ولا كده انتي حره ايمن هديكي سماعه حطيها في ودنك وخلي تليفونك مفتوح علي رقم ايمن

ياسمين : ايوه بس انا مش معايا رقم ايمن

يونس : هو ده إللي فارق معاكي هدهولك هدهولك عقبال ما اديكي بوكس في وشك

ياسمين : تؤ أوف بقي اوف

يونس بتريقه: اوف بقي اوف كتك نيله

وطبعا كل كده وايمن ميت علي نفسه من الضحك

يونس بصله بغضب : مخلاص يا أخويا اية فشتك عايمه ليه كده ما تهدي بقي

ايمن زود ضحك وهو شايف منظره كده

يونس بعصبيه : يا ايمن أسكت بقييييييي

ايمن بطل ضحك بس بصوت مكتوم علي يونس علي اخرو

يونس بضيق: اوف اسمعي بقي الكلام ده وتنفذيه بالحرق الواد فاهمه

ياسمين بسرعه : فاهمه فاهمه

يتبع….
يونس بعد ما شرح ليها الخطه : ها فهمتي كده
ياسمين كانت سرحانه

يونس بأستغراب : ياسمين

ياسمين كانت لسه زي ماهي

يونس بصوت عالي : يااااااااااااابت

ياسمين اتخضت وفاقت

ياسمين بخضه : يوووه خضتني يا اسمك ايه في ايه

يونس : يا اسمك ايه انتي يا بت انتي واقعه علي دماغك وإنتي صغيره

ياسمين بذهول : إيه ده عرفت إزاي هي المافيا سرها باتع كده

يونس بصدمه: سرها باتع لا يا اختي مش سرها باتع بس إحنا بنعرف الهبل من علي بعد

ياسمين بزعل : الله يسامحك يا يونس
يونس بسرعه : إيه ده إيه ده آنتي زعلتي أنا مكنش قصدي والله
ياسمين بضحك : وضحكت عليك وضحكت عليك

يونس بصدمه : ايه ده بقي انشالله
ياسمين بضحك : بهزر معاك يا شبح ياشبح لولولولي

يونس بصلها بذهول وراح بص لايمن شافه بيضحك

يونس بغضب لايمن : هو إنت يا بني عايش علشان تضحك في حاجات تانيه تتعمل علي فكرة

ايمن بضحك : البت دي فظيعه مش معقوله بجد

ياسمين طبطبت بإيدها علي دماغها زي ماتكون بتقولو تسلم

ولعبت حواجبها ليونس
يونس بصلها بغضب وهو بيدوس علي شفايفه إللي تحت بغيظ

ياسمين استخبت ورا ايمن تآني

ايمن بضحك انتي ايه يا بت هو إنت تعملي البلوه وتستخبي ورايا يا جبانه

ياسمين بصوت واطي : ياعم ده بيخوف وهو ميت اومال لما كان عايش كان عامل إزاي

ايمن بضحك : أخوف

ياسمين : يا راجل

ايمن ضحك

يونس بعصبيه : قوم روح يا ايمن انا مش ناقص قرف 24 ساعه ضحك قرفتني أخرس بقي انت مبتعملش حاجه غير إنك تضحك افصل شويه يا سوزان

ايمن بعد مكان بيضحك كشر : الله الله الله ولية بس الغلط يا شبح

يونس بسخريه: مزاجي كده اتهد بقي

ايمن بصله وسكت بس عايز يتضحك تآني بس مش عارف

يونس : وانتي يا ست سعاد يا حسني الله يرحمها ف قاطعته ياسمين بسرعه : بمناسبه الله يرحمها أكيد هي عندك صح ابقي سلملي عليها واقولها اني بحبها اوي

يونس : حاضر هسلملك عليها عقبال ماتروحليها وبعدين قال بهمس : بعد الشر

ياسمين بخضه : يلهوووووووي بعد الشر عليا انشالله إنت تقعد مع ابو لهب في زنزانة واحده

يونس : إنت يا بت انتي بتجيبي الكلام ده منين بخربيت لسانك

ياسمين بسخريه: منا أعرفك بقالي كتير من عاشر القوم يا أخويا

يونس نفخ : يا ولي الصابرين

ياسين وايمن ضحكو عليه وبعد كده قاعدو مع بعض شويه

وجه معاد النوم وياسمين كانت لسه سخنه شويه ايمن كان بيعملها كمادات وطبعا كل ده ويونس قاعد بصصلهم بغيظ وغيره ميعرفش مصدرها إيه

طلع الصبح ايمن قاعد ومعاه يونس في إلاوضه سمعو صوت اغاني بره طلعو لاقو ياسمين مشغله اغاني ومسكه المنفضه ولبسه جلبيه وحاطها علي شعرها طرحه لقاها زي بتاعت الخضار ولبسه شبب وكان شكلها يضحك ايمن ضحك عليها ويونس بصلها بصدمه ومسكه المنفضه تنفض شويه وترقص شويه

ياسمين وهي بترقص بتغني : ( آنتي معلمه في الشياكه والاناقه نظره منك اقوي طاقه واخده جايزه في اللباقة بنت ناس متعلمه انتي معلمه برنسيسه بنت باشا دي بقلاوة لا بوغاشه قفلت علي قلبي بكاشه بوقها قد السمسمه) ايمن بصلها بضحك ودخل يرقص معاها وهو بيضحك وهي كمان بتضحك وكملو رقص ويونس بيبص ليهم بصدمه وهما بيرقصو

يونس بصدمه : يا ولاد المجانين

الباب خبط كلهم اتخضو وقفلو الأغاني

وايمن راح يبص في العين السحريه شاف بتاع الكهربا خد نفسو وراح قال لياسمين : بتاع الكهربا

ياسمين : طب استنا اخش اجيب فلوس

ايمن بعصبيه : تعالي يا اختي إنتي واقفه مع سوسن إستني أروح أنا افتح وادفع

ياسمين : يا ايمن علشان محدش يشوفك هما عارفين إن أنا بس إللي عايشه لوحدي

ايمن : ودي تفوتني هخش البس النقاب

ياسمين ضحكت : ماشي

دخل ايمن يلبس النقاب وخرج فتح الباب
ايمن : ايوه نعم

بتاع الكهربا: عليكو 300 جنيه

ايمن : طيب ثواني اخش أجيب الفلوس

بتاع الكهربا: اتفضلي

ايمن دخل وقف ورا الباب طلع الفلوس من جيبه واداها لبتاع الكهربا وبتاع الكهربا ادالو الوصل ومشي

ايمن قفل الباب وادا الوصل لياسمين : خدي عدي الجمايل بقي

ياسمين بضحك : شكرا يا ايمن

ايمن : العفو العفو متتعوديش علي كده بقي
يونس ببرود: خلصتو العبط ده وبعدين بص لياسمين : اتفضلي لمي الميه والقرف ده

ياسمين بغيظ: أنا نفسي ارمي الميه دي فوق دماغك

يونس بصلها ببردو ودخل الاوضه

ياسمين بغيظ وصراخ: اااااه باااااارد

ايمن بضحك : معلش معلش تعالي يلا اسعدك في لم الشقه دي

ياسمين : والله أنا قولت محدش هيجبها غير أيموني يا عسل إنت

ايمن بضحك : أيموني طب يلا يلا ايمن ساعد ياسمين في تنضيف الشقه وبعد شويه خلصو وايمن قعد علي الكنبه بارهاق

ياسمين بضحك: معلش معلش انا عارفه ان الشقا وحش هخش اعملك فطار

ايمن بتعب: ياريت ونبي علشان خلاص هقع من طولي

ياسمين ضحكت ودخلت تعمل الفطار بعد شويه خرجت وكالو وبعدين ياسمين دخلت تاخد دش ونامت شويه

بعد المغرب صحيت خدت دش وبقت تشوف هتلبس إيه في

خروجه ناصر

طلعت فستان اسود شيك جدا وهيلز اسود وحطتو علي السرير

بعد كده قاعدت علي التسريحه بتحط الميكب ويونس جه ليها قعد السرير

يونس بغيظ: متقليش ميكب آنتي مش رايحه تقابلي مهند ده ناصر عادي

ياسمين وهي بتحط فونديشن : وانت مالك انا حره مش لازم ابقي متشيكه علشان اعجبو

يونس بغضب: تعجبي مين ياختي طب عالله أشوفك متقله يا ياسمين هيبقي يوم اسود

ياسمين بخوف مصطنع : اهدا يا شبح الله واخرج بقي علشان البس

يونس قام : ماشي ماشي يا ياسمين وخرج

ياسمين بضحك وغنا : كايده العزال انا من يومي كايده العزال ان من يومي ايوه آه هههههه وبعدين كملت ميكب بعد نص ساعه كانت مخلصه لبس وميكب وايمن ويونس كانو مستنينها بره

خرجت ويونس وايمن انبهرو من جمالها

ايمن بانبهار : إيه القمر ده

ياسمين بكسوف : شكرا يا ايمن

يونس غار لما سمع كلام ايمن

يونس بعصبيه: وبعدين بقي عدنا شغل يلا وإنتي تعالي هنا

ياسمين راحتله بخوف : نعم

نس : حسك عينك اسمعك بتضحكي معاه آوي هي ابتسامه خفيفه وخلاص ولو لمس أيدك آنتى حره فاهمة ولا لا
ياسمين : حاضر حاضر

ايمن بضحك : خلاص بقي امسكي يا ياسمين السماعه دي حطيها في ودانك وأنا سيفت رقمي عندك ها اول ما تروحي اتصلي بينا علي طول

ياسمين خدت منه السماعه : تمام ربنا يستر سلام

ياسمين نزلت ركبت تاكسي وقالت علي عنوان المطعم اللي ناصر قال عليه

يتبع….

ياسمين وصلت المطعم نزلت من التاكسي حسبتو ودخلت المطعم وهي بتاخد نفسها وحاطه أيديها على السماعه أللى تحت شعرها علي الناحية التانيه كان ايمن ويونس قاعدين وفاتحين التليفون علشان يسمعو ياسمين

يونس : شيلي أيدك من علي ودانك بطلي هبل

ياسمين اتخضت وشالت أيدها وفضلت تلف حوالين نفسها : بسم الله الرحمن الرحيم لا بقولك ايه شغل الجالا جالا ده مش معايا خف شويه

ايمن ضحك بصوت متكوم

يونس : جالا جالا طب خشي يا اختي خشي

ياسمين لصوت واطي : دخلت فيك تريله يكون سواقها أعمي واطرش يا بعيد إيه ده أنا بدعي علي واحد ميت أصلا إيه العبط ده
ايمن ضحك ( هو ايمن تقريبا مش بيعمل حاجه غير انو بيضحك) يونس بصله كتم الضحكه

يونس : أخلصي يا شحروره اخلصي
ياسمين دخلت بدلع

يونس : امشي عدل

ياسمين بخضه : لا بقي إنت شايفني إزاي يخربيتك وبعدين فضلت تدور حوالين نفسها علشان تعرف هو شايفها إزاي

يونس : متحوليش مش هتعرفي

ياسمين بغيظ: يا مصبر الوحش علي الجحش

يونس : ماشي يا محترمه ماشي إما تيجي

ياسمين باستفزاز : مش هتعرف تعمل حاجه

يونس كان هيتكلم ايمن أتكلم : مخلاص يا جدعان بقي الله اهدا يا بني وإنتي يا حاجه خشي بقي الواد قاعد جوه بقالو ساعتين

ياسمين : ايمن متخلهوش يتكلم وأنا جوه ولا يفتح بقو علشان والله اخرب الدنيا وامشي عادي

يونس لسه هيتكلم ايمن أتكلم : حاضر يا ياسمين يلا خشي بقي

ياسمين بثقه: اشطا علي الله التساهيل وراحت دخلت
لاقت ناصر قاعد علي التربيزه مستنيها
ياسمين رحتلو بتوتر : هاي
يونس بسخريه : هاي الله يرحم
ايمن ضحك بصوت واطي وقال : بس بقي يا يونس

ناصر وهو بيبوس أيدها : احلي هاي والله

يونس بتريقه: احلي هاي والله يحرق دم امك السم

ايمن خبط علي بقو بمعني أسكت

يونس بصله من فوق لتحت وسكت

ياسمين برقه مصطنعه: اتاخرت عليك
ناصر بابتسامه : انتي تتأخري برحتك يا باشا
ياسمين بضحك دلع : ههههيييي أنا مش قد الكلام الحلو ده بضعف والله وخصوصا إني مع شاب كل البنات بتترمي تحت رجليه

ناصر بضحك : حقيقي فعلا بس أنا مليش في الكلام ده انا محترم

ياسمين في نفسها : يابن الكدابه

ياسمين : طبعا هو حد يقول غير كده
ناصر : طيب إيه مش هنتعرف علي بعض
ياسمين : لو هنتعرف علي بعض قول إنت الأول
ناصر بأبتسامة : طيب بصي يا ستي أنا إسمي ناصر الصاوي
ياسمين بسخريه : منا عارفه إنك ناصر الصاوي قال يعني فكراك ناصر الدسوقي

عندي ٣٣ سنه وطبعا آنتي عارفه إني رجل اعمال كبير وكده إنت وحيد أبويا وأمي وتخيلي متجوزتش لحد دلوقتي علشان ملقتش البنت المناسبه ليا

ياسمين بصدمه من كدبه: يا كداب يابن الكدابه هو إللي هيحصل فيك شويه

ناصر بتكلمه : لآسف أنا قلبي متحفتش لحد من بعد ما البنت إللي كنت بحبها خنتني
ياسمين في نفسها بسخريه: يعيني وبعدين يا بن الكدابه

ناصر : علشان بس الشركه بتاعتنا الاسهم بتاعتها نزلت واعلانا افلاسنا وهي لما عرفت إن فلست راحت وخنتني مع أعز أصدقائي تخيلي قلبي اتكسر كسرت قلبي وإنا كنت يموت فيها
ياسمين: يلهووووي علي المحن والتمثيل
ناصر : ومن ساعتها وأنا قافل باب الحب نهائي بس شكله كل ده هيتغير علي أيدك آنتي بقي
ياسمين بقرف : يااااه دانت اتظلمت آوي وكويس إنك عرفت تجمع فلوس تآني وتكبر الشركه المال الحلال عمرو ما يروح بتقول كده من تحت ضرسها

ناصر بابتسامة : اكيد المهم دورك انتي بقي
ياسمين طبعا هتكدب في حاجات كتير زي اسم ابوها وسنها وكده يعني : أنا إسمي ياسمين إسماعيل عمري ٢٥ سنه وحيده أبويا وأمي وهما ماتو في حادثه وصاحب البيت طردني علشان فلوس الايجار واشتغلت حاجات كتير بس مش مشيت منها علشان المدراء إللي في مكنوش محترمين وخارجه من المدرسه من ٣ اعدادي علشان أبويا كان مش معاه يكمل تعليمي ودلوقتي بقيت إشتغل في المطعم إللي إنت شوفتني فيه واجرت شقه حلوه لما عرفت إن المرتب بتاعي كويس بس وبعد كده قبلت حضرتك
طبعا ياسمين كانت بتكدب وقالتلو علي إللي ايمن ويونس قالو وبس
وناصر أبتسم لما هي حكت كده لإنه ده إللي عارفه عنها علشان طبعا بعت واحد من اللي شغالين معاه وجاب كل حاجه عنها وإللي شغال عندو ده تبع ايمن وايمن إللي قالو يقول كده علشان ناصر يصدق وميعرفش عنها حاجه غير إللي هما قالو عليه بس
ناصر : ربنا يرحمهم ويقويكي
ياسمين : يارب
ناصر : ها بقي تكلي إيه
اسمين بسرعه : ها شكرا مش عايزه مش جعانه والله
ناصر بإصرار : لا إزاي مينفعش ده أنا إللي عزمك

ياسمين : طيب مدام مصمم وبعدين مسكت المنيو
وقرت فيه ومفهمتش حاجه : لا بص أنا مش فاهمه حاجه من البتاع ده ده شكلهم بيعملو لحم حمير هنا ولا اية بص اختارلي إنت

ناصر ضحك : ههههه لحم حمير خلاص هختارلك انا

ياسمين هزت دماغها بأبتسامه خفيفه وبعد شويه ناصر أختار ونده الجرسون وطلب الاكل
ناصر بأبتسامه : الا قوليلي يا سمين هو إنتي في حد في حياتك مرتبطه بحد يعني
ياسمين : لا هو أنا لو مرتبطه كان زماني قاعده معاك دلوقتي

ناصر : إجابة مقنعه يا يا سمنتي

ياسمين : نعم ياس إيه
ناصر : منتي بقولك بالياء الملكيه

ياسمين : لا معلش خليها ياسمين أحسن

ناصر : ليه بس مش لازم ناخد علي بعض داحنا هنبقي أهل يعني
ياسمين : أهل اهل إزاي يعني معلش

ناصر : إيه ياسمين اهل يا حبيبتي يعني اجي اخطبك واتجوزك و كده يعني وبعدين أنا ناوي لما أتجوز اسفر مراتي روسيا نعمل هاني مون هناك

ياسمين : لا يا حبيبي بلا هاني مون بلا هاني رمزي مينفعش

ناصر بأستغراب : هو إللي مينفعش

ياسمين بتوتر : قصدي يعني زي مانت عارف انا عايشه لوحدي ومليش حد تطلبني منه ربنا يرزقك باللي احسن مني

ناصر بسرعه : لا طبعا أنا عمري ما هلاقي

الجزء الرابع 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى